失業的人真辛苦     為著生活顧腹肚
隨著時間的腳步     已經袂記故鄉路
期待早日找頭路     無驚過程多艱苦
踏著歸鄉的路途     一路走來真幸福

Ps.本作品另投稿野葡萄文學誌

明白人生短短才幾年     煩惱嘛愛過日子
心情放乎開     健康卡要緊
是是非非的世情     隨風放水去
起起落落感恩心 堅持是咱的
認真打拼     一關一關過
好的撿身邊     歹的不批評
一步一腳印     實在不變心
一步一腳印     經驗智慧深

Ps.本作品另投稿野葡萄文學誌

布袋戲尪仔、鉛筆盒仔……
入電土會打鼓的猴猻仔，
我攏真合意。
向望的新衫、新鞋，
爸爸位臺北帶轉來的，
阿嬤講：「拜拜鬧熱時才會當穿。」

阮爸爸佇都市做土水，
媽媽跟小工。
自細漢阮兄弟姊妹……
就佮阿嬤滯佇田莊，
守著一大落的家園。

阿嬤講：
「種作已經飼未飽這陣囝仔囉！
　你們愛認真讀冊，
才未像恁老爸　
做憨牛。」
阮三頓白飯攪豆油，
也吃甲真粗飽，
阿嬤你敢會知？

爸爸欲出門時，
交代阮愛聽阿嬤的話；
媽媽的長途電話中，
時常問阮
會想in無？

哎！sâi衫、sâi褲、新chhit-thô物……
團圓的時，
就想著離別的日子。
每工暗暝，
我亂操操的心事，
只好藏佇窗外的天星。

───寫佇 1996.6.28

蒜頭一斤偌濟？
柑仔、柳丁……又閣是偌濟？
賣出的、買轉的……
怎會差這nih濟？

學雜費交偌濟？
每個月紅、白包偌濟？
後生的聘金佗位chhÖe？
會仔錢是一會飼一會
農業貸款比較省
田園只有幾分地！

聽講，兩岸欲三通囉！
用飛的、會遁的生意人走了了
聽講欲加入WTO囉！
外銷的電子公司頭家
直講無問題
我只關心：
Chit-má，一分地
價值偌濟？

選舉時，政治人物講阮是「頭家」
（阮毌捌字兼無讀冊）
日常三頓
「老農年金」可免
「轉作津貼」可免.……
但是，請kä阮講：
未來的日子……………
阮欲按怎過？

----2001.1.1不忍齋

說明：
1.據報載（2001.5.3中國時報）台灣加入WTO後，蔗農、蕉農…等
農民估計將有200萬人面臨失業的問題。
2.本詩使用「漢字」加「教會羅馬字(白話字)」書寫。

註1.偌濟：多少。
註2.這nih濟：這麼多。
註3.後生：兒子。
註4.佗位：那裡。
註5.chhÖe：找。
註6.chit-má：現在。
註7.毌捌字：不識字。
註8.三頓：三餐。
註9.kä阮講：告訴我。
註 10.按怎：如何。

※感謝丁鳳珍小姐校對這首詩的台語用字。

大海寵幸的潮間帶
腳仙
　蛤仔
　　光大
　　　西刀舌
分駐落糊糜濕地底的四層樓
這是咱活力的海岸
生命之源泉

跟隨潮汐的跤步
「三更嘛去半瞑嘛行」
銅皮鐵骨、忠直硬氣
豪爽自信的笑聲
這是海口人的本色
咱可愛鄉親

碼頭內底電排相客排規列
麻黃仔手牽手佇海墘
赤查某四界開了白花
馬鞍藤小姐頭鬃插著淡紫色的花蕊
偷偷啊爬起擋波堤頂煽海風∼∼
廟口老街鬧熱滾滾
蚵嗲、丸仔羹、海豬肉煎……
以及鱸鰻